കഴിഞ്ഞ മഴക്കാലത്ത് നട്ട വാഴകൾ പലതും ഇപ്പോൾ കുലച്ചോ അല്ലെങ്കിൽ കുലയ്ക്കാറായോ നിൽക്കുന്ന സമയമാണ്. ഇനി വരുന്നത് കടുത്ത വേനലായതുകൊണ്ട് വാഴക്കർഷകർ അതീവ ജാഗ്രത പാലിക്കേണ്ടതുണ്ട്. വെള്ളം കുറയുന്നതും കടുത്ത വെയിലും വാഴയുടെ വിളവിനെ സാരമായി ബാധിക്കും. വാഴക്കുലകൾക്ക് തൂക്കം കുറയാതിരിക്കാനും, വാഴ ഒടിഞ്ഞു വീഴാതിരിക്കാനും ഇപ്പോൾ ചെയ്യേണ്ട കാര്യങ്ങൾ നോക്കാം.
1. പുതയിടൽ (Mulching) നിർബന്ധം:
മണ്ണിലെ ജലാംശം നഷ്ടപ്പെടാതിരിക്കാൻ ഏറ്റവും മികച്ച മാർഗ്ഗം പുതയിടലാണ്. വാഴയുടെ ചുവട്ടിൽ നിന്ന് അല്പം മാറ്റി ഉണങ്ങിയ വാഴയില, കരിയില, അല്ലെങ്കിൽ തൊണ്ട് എന്നിവ കനത്തിൽ അടുക്കി വെക്കുക. ഇത് വേരുകൾക്ക് തണുപ്പ് നൽകുകയും മണ്ണിലെ ഈർപ്പം നിലനിർത്തുകയും ചെയ്യും.
2. നനയ്ക്കേണ്ട രീതി:
വാഴ കുലച്ചു നിൽക്കുന്ന സമയത്താണ് ഏറ്റവുമധികം വെള്ളം ആവശ്യമുള്ളത്. വെള്ളം കുറഞ്ഞാൽ കുലയിലെ കായകൾ ചുക്കിിച്ചുളിയാനും തൂക്കം കുറയാനും സാധ്യതയുണ്ട്. 3-4 ദിവസത്തിലൊരിക്കലെങ്കിലും നനയ്ക്കാൻ ശ്രദ്ധിക്കുക. തുള്ളിനന (Drip Irrigation) സംവിധാനം ഉണ്ടെങ്കിൽ വളരെ നല്ലതാണ്, അത് വെള്ളം ലാഭിക്കാനും കൃത്യമായി വേരുകളിൽ വെള്ളമെത്തിക്കാനും സഹായിക്കും.
3. തടതുരപ്പനും മാണവണ്ടും:
വേനൽക്കാലത്ത് വാഴയെ ആക്രമിക്കുന്ന പ്രധാന വില്ലനാണ് തടതുരപ്പൻ പുഴു. വാഴയുടെ തടയിൽ ചെറിയ ദ്വാരങ്ങൾ കാണുന്നതാണ് ലക്ഷണം.
- പ്രതിവിധി: വേപ്പിൻ പിണ്ണാക്ക് 1 കിലോ വാഴ ഒന്നിന് എന്ന തോതിൽ തടത്തിൽ ഇട്ടുകൊടുക്കുന്നത് കീടങ്ങളെ അകറ്റാൻ സഹായിക്കും. കൂടാതെ, ബ്യൂവേരിയ (Beauveria) എന്ന ജൈവ കീടനാശിനി തടത്തിൽ ഒഴിക്കുന്നതും ഫലപ്രദമാണ്.
4. വെയിൽ മറ:
കുലച്ച വാഴകളുടെ കുലകളിൽ നേരിട്ട് കടുത്ത വെയിൽ അടിക്കുന്നത് കായലുകൾക്ക് പൊള്ളലേൽക്കാൻ (Sun Scald) കാരണമാകും. ഇത് ഒഴിവാക്കാൻ വാഴയില കൊണ്ട് തന്നെ കുലകൾക്ക് ചെറിയൊരു മറ നൽകുന്നത് ഗുണം ചെയ്യും.
ഗ്രീൻ വില്ലേജ് വാട്സാപ്പ് ഗ്രൂപ്പിൽ ചേരൂ