ഒരു മാസം എന്ന പേരിലാണ് ടെലികോം കമ്പനികൾ 28 ദിവസത്തെ റീചാർജ് പ്ലാനുകൾ നൽകി വന്നിരുന്നത്. ഇതുവഴി, യഥാർത്ഥത്തിൽ ഒരു ഉപഭോക്താവ് ഒരു വർഷം 12 തവണയ്ക്ക് പകരം 13 തവണ റീചാർജ് ചെയ്യാൻ നിർബന്ധിതനാകുന്നു. അതായത് ഒരു വർഷം അധികമായി ഒരു മാസത്തെ പണം നമ്മൾ കമ്പനികൾക്ക് നൽകേണ്ടി വന്നിരുന്നു. ഈ സാമ്പത്തിക ബാധ്യതയാണ് പുതിയ നിയമത്തിലൂടെ ഇല്ലാതാകുന്നത്.

സാധാരണക്കാരായ ഉപഭോക്താക്കൾക്ക് ഈ സാമ്പത്തിക ആശ്വാസം നേരിട്ടു നേടിക്കൊടുക്കാൻ കൊടിക്കുന്നിൽ സുരേഷ് എംപി പാർലമെന്റിൽ നടത്തിയ ഇടപെടലാണ് ഈ തീരുമാനത്തിൽ നിർണായകമായത്. അദ്ദേഹം ഈ പ്രശ്നം ഉന്നയിക്കുകയും പാർലമെന്റിൽ ശ്രദ്ധയിൽപ്പെടുത്തുകയും ചെയ്തതിനെ തുടർന്നാണ് ടെലികോം മന്ത്രാലയം ഈ കർശന നിർദ്ദേശം പുറപ്പെടുവിച്ചത്.

എല്ലാ ടെലികോം കമ്പനികളും ഉപഭോക്താക്കൾക്കായി 30 ദിവസത്തെ വാലിഡിറ്റിയുള്ള പ്ലാനുകൾ നിർബന്ധമായും ലഭ്യമാക്കിയിരിക്കണം എന്നാണ് കേന്ദ്ര സർക്കാരിന്റെ നിർദ്ദേശം. വരും ദിവസങ്ങളിൽ തന്നെ എല്ലാ നെറ്റ്വർക്കുകളിലും ഈ മാറ്റങ്ങൾ ലഭ്യമായി തുടങ്ങും. ഇത് സാധാരണക്കാർക്ക് വലിയ രീതിയിലുള്ള ലാഭം ഉണ്ടാക്കിക്കൊടുക്കും.