ഫുൾ ഡെപ്ത് റെക്ലമേഷൻ സാങ്കേതികവിദ്യ; ഇതാ പരിസ്ഥിതി സൗഹൃദ റോഡ് നിർമാണ രീതി | Full depth reclamation technology – environmental friendly road making system
റോഡ് നവീകരണം തുടങ്ങി. റോഡിലെ സാധനങ്ങൾ ഇളക്കിമാറ്റി അതേ വസ്തുക്കൾ കൊണ്ടാണ് പുനർനിർമിക്കുന്നത്. ആധുനിക സാങ്കേതികവിദ്യ ഉപയോഗിച്ച് ഫുൾ ഡെപ്ത്ത് റെക്ലമേഷൻ രീതിയിൽ മലബാറിലെ ആദ്യ റോഡാണിത്. ഊരാളുങ്കൽ ലേബർ കോൺട്രാക്ട് കോഓപ്പറേറ്റീവ് സൊസൈറ്റിയാണു നിർമാണം നടത്തുന്നത്. നിലവിലെ റോഡ് മുക്കാൽ അടി കനത്തിൽ ഇളക്കി മറിച്ച് ആ നിർമാണ സാമഗ്രികൾ പൂർണമായും ഉപയോഗിച്ച് കൂടെ സിമന്റും സ്റ്റെബിലൈസറും വെള്ളവും ചേർത്ത് പൾവറൈസ് ചെയ്യുന്ന മെഷീൻ്റെ സഹായത്തോടെ വിരിക്കുകയാണ് ആദ്യഘട്ടം. പിന്നാലെ പാഡ് ഫുട്ട് റോളർ ഉപയോഗിച്ച് ബലപ്പെടുത്തി ഗ്രേഡർ മെഷീൻ ഉപയോഗിച്ച് നിരപ്പാക്കും. വൈബ്രേറ്ററി റോളർ ഉപയോഗിച്ച് അമർത്തുകയും ചെയ്യും. അതിനു ശേഷം ന്യൂമാറ്റിക് ടയർ റോളർ ഉപയോഗിച്ച് ഉപരിതലം മിനുക്കും.
ഇത്തരത്തിൽ നിർമിക്കുന്ന റോഡ് 7 മണിക്കൂർ മൂടിവയ്ക്കുകയും 7 ദിവസം നന്നായി നനയ്ക്കുകയും വേണം. ഈ കാലയളവിൽ വാഹനം പോകരുത്. എന്നാൽ മാത്രമേ ഉയർന്ന ഗുണനിലവാരത്തിലുള്ള ദൃഢമായ പ്രതലം ലഭിക്കൂ. അതിനു ശേഷം ഇമൽഷൻ തളിച്ച് പോളി പ്രൊപ്ലീൻ പേവിങ് ഫാബ്രിക് വിരിച്ച് ബിറ്റുമിൻ കോൺക്രീറ്റ് കൊണ്ട് ഫിനിഷിങ് പൂർത്തിയാക്കും. എഫ്ഡിആർ നിർമാണ രീതി വ്യാപകമാകുന്നതോടെ നിർമാണവസ്തുക്കൾക്കായി പ്രകൃതിയെ ചൂഷണം ചെയ്യുന്നത് കുറയ്ക്കാനാകും. ദൃഢവും ഏറെക്കാലം ഈടുനിൽക്കുന്നതുമായ റോഡായതിനാൽ അടിക്കടിയുള്ള അറ്റകുറ്റപ്പണിയും പുനർനിർമാണവും ഒഴിവാക്കാനാകും. നിർമാണ പ്രവൃത്തിയുടെ വേഗം കൂട്ടാനും ചെലവു കുറയ്ക്കാനും എഫ്ഡിആർ രീതി സഹായിക്കുമെന്ന് യുഎൽസിസി അധികൃതർ പറഞ്ഞു. സംസ്ഥാനത്ത് ഗ്രാമീണ റോഡുകളിലാണ് ഈ രീതി വ്യാപകമായി നടപ്പാക്കുന്നത്. പിഎംഎസ്ജിവൈ പദ്ധതിയിൽ മലബാർ മേഖലയിൽ ഊരാളുങ്കൽ സൊസൈറ്റിക്ക് ഇത്തരം 13 കരാറുകൾ ലഭിച്ചിട്ടുണ്ട്.